Pro 15 | ZomZIV | STEP | Kamnem a dawnna in thangpaihna daisak a, kamkhauh in ahileh hehna sosak hi.

Proverbs 15

1 Kamnem a dawnna in thangpaihna daisak a, ^a
kamkhauh in ahileh hehna sosak hi.
2 Mipilte leii in theihna phata,
mihaite kam in ahileh haina phulkhiasak hi. ^b
3 Mun khempeuh ah TOPA mit om a, ^c
misia le mipha a encik hi.
4 A damsak thei leii nuntakna singkung hi-a,
a khem thei leii in ahileh lungsim a suzan hi. ^d
5 Mihai in a pa sekna nial-a,
puahphatna a thusim mi ahileh pilvangna lak ahi hi. ^e
6 A thumaan mi inn ah gou tampitak om a,
migilote sumtum in amaute lungkhamsak hi. ^f
7 Mipilte muk in theihna thehzak a, ^g
mihaite lungsim in a tua cih kei hi.
8 Migilote biakpiakna TOPA in kih a, ^h
a thutang mite thungetna in amah lungkimsak hi.
9 Migilote zuih lampi TOPA in kih a, ⁱ
thumaan a delhte a it hi.
10 Lampialte khauhtakin sek kul a,
puahphat a ut lote si ding hi. ^j
11 Sihna le suksiatna ^{▼▼15.11 Hebrew in Sheol le Abaddon}, TOPA mai-ah kilangin om ahileh -
mihingte lungsim kilangzaw ngel ve! ^l
12 Mi simmawhpa in kipuahphat ding hehsan hi;
mipilte thu dong lo ding hi.
13 Lungsim-nopna in maitaisak a,
lungsim-natna in ahileh lungsim a suzan hi. ^m
14 Theihkakna lungsim in theihna zonga, ⁿ
mihaite kam ahileh haina-in kivak hi.
15 A kinengcipte nuntak hun sung gimna vive hi-a,
a lungtai mite pawi bawlbawl ahi hi.
16 Hauh mahmah a buai sangin
tawmkha nei a TOPA kihtak hoihzaw hi. ^o
17 Kimuhdahpipi a bawngno vakthau sa nek sangin
ki-it diamdiam a anteh meh nek hoih zaw hi. ^p
18 Lungtom mi in kiselna khangsak a, ^q
lungduai mi in kitotna daisak hi. ^r
19 Zongzawte lampi ling in khak a,
a thutangte lampi ahileh lam lianpi ahi hi. ^s
20 Tapa pil in a pa lungnuamsak a, ^t
mihai in ahileh a nu a thusim kei hi.
21 Thukhentel thei lo mi in hai nuamsa a, ^u
thu theitel mi ahileh thutangin a gamta hi.
22 Kikupna om loin geelnate tangtung lo a,
thu kuppih tampi tawh tuate kizo zo hi. ^v
23 Ahi liana dawnna in mite lungnuamsak hi - ^w
a hun lian tawh kituaka kampau nak hoih sem ve! ^x
24 Mipilte adingin nuntakna lampi paito a,
hankhuk ^{▼▼15.24 Hebrew ah Sheol} manawha paisuk nading panin a kem hi.
25 TOPA in kiphasakte inn phelkek a,
meigong numeite kigi bittakin kepsak hi. ^z
26 TOPA in migilote ngaihsutna kih a,
lungsim siangthote aa ahileh lungkimpih hi. ^aa
27 A huaiham mi in a inn sung lungkhamsak a,
golhsum a mudah mi a nungta ding hi. ^ab
28 A thumaante lungtang in a dawn kik nading khingkhaikhai-a,
migilote kam panin ahileh thusia phulkhiakhia hi.
29 Migilote kiang panin TOPA gamla a,
ahi hangin a thumaante thungetna a za hi. ^ac
30 Maitaisa-a etna in lungsim nuamsak a,
thuthak hoih in guhte damsak hi. ^ad
31 Nuntakna a pia taihilhna a ngaipa,
mipilte tawh kikhawl thei ding hi. ^ae
32 Sektatna a awlmawh lopa amah le amah kithusim lo hi-a, ^af
kipuahphat a sawm mi ahi leh theihtelna ngah ahi hi. ^ag
33 TOPA kihtakna in pilna ^{▼▼15.33 Ahikeh Pilna in TOPA} hilh-a,
pahtawina ma-in kiniamkhiatna om masa hi. ^ai